کردنەوەی ئەژمێری پاشەکەوت (حساب توفیر) هەر کەسێک ئارەزووى دانانی پارەی هەبێت، بە مەبەستی پاشەکەوت و سوودی ساڵانە، دەتوانێت ئەژمێرى پاشەکەوتی لە یەکێک لە بانکە بازرگانییە حکومییەکان بکاتەوە و ببێت بە خاوەنی دەفتەری پاشەکەوت.
کردنەوەى ئەژمێرى ڕەوەنى (حساب جاری) بۆ هاوڵاتییان هەر کەسێک ئارەزووى کردنەوەى ئەژمێرى تایبەت بە خۆی هەبێت لە بانکە بازرگانییە حکومییەکان دەتوانێت ببێت بە خاوەن ئەژمێری بانکی (چەکى بانک)، بە مەبەستی دانان و ڕاکێشانی پارە لە بانکە حکومییەکان.
پەسەندکردنی بریکارنامەکان (تایبەت، گشتی، حجە وصایە، سەرەتاکانی کۆمپانیا) هەر مامەڵەیەک، کە پێویستی بە پاکانەی باج هەبێت وەک مامەڵەکانی بریکارنامەی (تایبەت، گشتی) یاخود حجە وصایە و سەرەتاکانی کۆمپانیا، یان هەر مامەڵەیەکی تری هاوڵاتییان و کۆمپانیاکان کە لە دەرەوەی وڵات ئەنجام درابێت، بە مەبەستی بەکارهێنان لە کوردستان یاخود بە پێچەوانەوە، یان هەر مامەڵەیەک لە ناوخۆی کوردستان ئەنجام درابێت و بەکاربهێنرێت، لە بەڕێوەبەرایەتییەکانی باجی دەرامەت پاکانەی باجی دەرامەتی بۆ دەکرێت و لە لایەن بەڕێوەبەرایەتیی گشتیی باجەکان و خانووبەرەی میری پەسەند دەکرێت.
کردنەوەى ئەژمێرى ڕەوەنى (حساب جاری) بۆ کۆمپانیاکان هەر کۆمپانیایەک ئارەزووى کردنەوەى ئەژمێرى هەبێت، لە بانکە بازرگانییە حکومییەکان دەتوانێت ببێت بە خاوەن ئەژمێرى بانکی و (چەکى بانکی)، بە مەبەستی دانان و ڕاکێشانی پارە لە بانکە حکومییەکان.
دەستەبەرى بانکى (خطاب ضمان) هەر کۆمپانیا و بەڵێندەرێک لە کاتی وەرگرتنی تەندەرێک بۆ ئەنجامدانی هەر پڕۆژەیەک، پێویستە بە بەهای تێچووی ئەو پڕۆژەیەی ئەنجامی دەدات دەستەبەری بانکی (خطاب ضمان) لە یەکێک لە بانکە بازرگانییە حکومییەکان بکات، ئەمەش بە شێوەی دانانی پارەی کاش یاخود بارمتەکردنی (ڕەهنکردنی) موڵکە گوستراوە و نەگواستراوەکان (ئاسانکاری) دەبێت.
پێدانى قەرزى ئاسانکاری (مکشوف، کۆمپیاڵە، قەرزى کاش) دابینکردنی پارەى کاش (نقدي) بۆ سەوداکارانى بانک بە تایبەتى (بەڵیندەران و کۆمپانیاکان و هاوڵاتیان) بۆ ئەنجامدانی پڕۆژەکانیان، بە مەرجێک ئاسانکارییان کردبێت لە بانک واتا (موڵکێکی گواستراوە یاخوود نەگواستراوە یان بارمتە (رهن) کردبێت)، و ڕێژەى سوودى ساڵانەى قەرزەکە لەسەر قەرز وەرگر (١١٪) دەبێت.
سەفتەجەى ڕاکێشراو لەسەر بانک (چەکی بانکی) دروستکردنى چەکى بانکییە بۆ هاوڵاتیان، بە مەبەستى ڕاییکردنی ئەو مامەڵە فەرمییانەی لە بری پارەی کاش پێوستییانە لە دامودەزگاکانی حکومەت، وەک (چەکی دەرهێنان و نوێکردنەوەی پاسپۆرت).
اعتمادات مستندية (L.C) جێبەجێکردنى گرێبەستەکانى حکومەت لەگەڵ کۆمپانیا و لایەنەکانى مامەڵەکردن لەگەڵ حکومەت، بەپێى ڕێنمایى ژمارە (٢)ى ساڵى ٢٠١٦، بۆ پاراستنى ماڵى دەوڵەت.
پێدانى پێشینەى هاوسەرگیرى بۆ هاوڵاتیان پێدانى پێشینەى هاوسەرگیرى بۆ گشت هاوڵاتیانى هەرێمى کوردستان، کە دامه‌زراوبن یان دانەمەزراو لە دامودەزگاکانى حکومەتى هەرێمى کوردستان، به‌پێی ڕێنمایی دارایی ژماره (٣٣) ساڵی ٢٠٠٧.
دابینکردنی مافى خانەنیشنى بۆ میراتگرانی کەرتی شارستانی دابینکردنى مافى خانەنشینییە بۆ میراتگرانى ئەو فەرمانبەرانەی، کە بە شێوەیەکی هەمیشەیی، لە یەکێک لە دامودەزگاکانی حکومەت دامەزراون و لە دەوامی فەرمییان بەردەوام بوونە تا ئەو کاتەی کۆچى دواییان کردووە. بەپێی دابەشنامەی شەرعی، میراتگرانی سوودمەند دەبن لە مافی خانەنشینی.
