مۆڵەتی کارکردنی پیشەی نووسینگەکانی مۆرهەڵکەندن

دەبێت تەمەنی خوازیاری مۆڵەت لە هەژدە (١٨) ساڵ کەمتر نەبێت.

پێویستە هەر پیشەیەک سەرەتا لە بەڕێوەبەرایەتیی گشتیی تۆمارکردنی کۆمپانیاکان ناوە بازرگانییەکەی تۆماربکرێت.

دەبێت تۆمارێکی هەبێت نموونەی هەموو ئەو مۆرانەی تێدا بێت کە ڕۆژانە دروستیان دەکەن، وە ناوی ئەو کەسانەی مۆرەکە بە کردن دەدەن و ئەوانەی وەری دەگرنەوە لەگەڵ ژمارە و ڕۆژی ئەو نووسراوەی لە دەزگا بەرپرسەکانەوە پێیان دراوە بۆ دروستکردنی ئەو مۆرانە.

پێویستە تۆمارەکە ناو و ناونیشانی ئەو کەسە یان ئەو لایەنەی تێدا بنووسرێت کە داوای دروستکردنی مۆرەکەی کردووە.

هەر دوو (٢) مانگ جارێک بە نووسراوێکی تایبەت و لە تۆمارێکی تایبەتدا نموونەی هەموو ئەو مۆرانەی کە دروستکراون دەدرێنە بەڕێوەبەرایەتیی گشتیی لەگەڵ نووسراوانەی بۆ دروستکردنی مۆرەکان لە دەزگا و فەرمانگە و حزب و لایەنەکانەوە وەریان گرتوون، هەموو ئەو زانیارییانەش دەبێت لە تۆماری سەرەکی نووسینگە تۆمارکرابن.

لیژنەی چاودێری و پشکنین لە هەموو کات و ساتێکدا بۆی هەیە نووسینگە بە هەموو بەشەکانییەوە بپشکنێت.

ئەو تیپانەی کە بۆ کاروباری مۆرهەڵکەندن دروستی دەکەن، یان دایدەڕێژن، دەبێت بە نووسراوی ڕەسمی لە ڕێگەی بەڕێوەبەرایەتیی گشتیی داوا لە چاپخانەکان بکرێت بۆ دابینکردنی داوای داواکردنی خاوەن مۆڵەتەکە خۆی.

تەنیا کەسی مۆڵەتدراو بۆی هەیە لە کارگەکەدا کاربکات، بە پێچەوانەوە سەرپێچیکار توندترین سزا دەدرێت.

پیشەوەر خۆی داواکاری پێشکەشبکات، یاخود لە ڕێگەی بریکاری یاسایی.

مۆڵەتی پیشەیی بۆ ماوەی یەک (١) بۆ سێ (٣) ساڵە و پێویستە نوێبکرێتەوە.

وەرگرتنی ڕەزامەندی بەڕێوەبەرایەتیی باجی دەرامەت و بەڕێوەبەرایەتیی ئاسایش.

بڕوانامەی خوێندن، یان هەر بەڵگەنامەیەکی دیکە بە مەرجێک کە بیسەلمێنێت خوازیاری مۆڵەت خوێندەواری هەیە.

بۆ بیانییەکان پێویستە کارتی نشینگەی هەبێت و ماوەکەی بەسەر نەچووبێت.