پێدانی ڤیزا

پێدانی ڤیزای هاتنە ژوورەوە بۆ ماوەی سی (٣٠) ڕۆژە، بە مەبەستی سەردان یان گەشتیاری.

داواکردنی ڤیزای ئەلیکترۆنی بۆ کەسی بیانی بە هەموو جۆرەکانییەوە، لە ڕێگەی پۆرتالی ڤیزای ئەلیکترۆنی (https://visit.gov.krd/ckb) پێشکەشدەکرێت.

دەکرێت ڤیزای سەردانی درێژبکرێتەوە بۆ کەسی بیانی پاش هاتنە ژوورەوە بۆ ماوەی سی (٣٠) ڕۆژ تەنیا بۆ دوو (٢) جار بەرامبەر بڕێک ڕسومات، بەمەرجێک هۆکاری درێژکردنەوەکە پەسەند بێت، بە داواکاری لەلایەن خودی کەسی بیانی، ئەم درێژکردنەوەیە لە دەسەڵاتی بەڕێوەبەری نشینگەکانە.

زانیاری ڤیزای ئەلیکترۆنی پاش دەرچوون و پێدانی ڤیزا هیچ گۆرانکارییەکی تێدا ناکرێت و لەکاتی هەبوونی هەر هەڵەیەک ئەو ڤیزایە بە هەڵوەشاوە ئەژمار دەکرێت، پێویستە ڤیزایەکی نوێ داوا بکرێت بەپێی داواکارییەک و ڕسوماتێکی نوێ و جێبەجێکردنی گشت ڕێکارە یاساییەکان، بەڵام ئەگەر هەڵەکە هۆکارەکەی لەلایەن وەزارەتەوە بوو، ئەوا ڤیزای نوێی پێدەدرێت بە بێبەرامبەر.

ئەگەر کەسی بیانی هەڵگری ڕەگەزنامەی وڵاتانی لیستی (أ) بیت، کە پێکهاتوون لە وڵاتانی (ئەلبانیا، ئوستڕاڵیا، نەمسا، بەحرەین، بەلجیکا، بەڕازیل، بولگاریا، کەنەدا، چین، کرواتیا، قوبرس، کۆماری چێک، دانیمارک، ئەستۆنیا، فینلاند، فەرەنسا، ئەڵمانیا، یۆنان، ڤاتیکان، هەنگاریا، ئایسلەند، ئێران (کۆماری ئیسلامی)، ئیرلەندا، ئیتاڵیا، ژاپۆن، ئوردن،، کۆریای باشور، کوەیت، لاتیڤیا، لوبنان، لیخنشتاین، لیتوانیا، لوکسەمبۆرگ، ماڵتا، هۆڵەندا، نیوزلاند، نەرویج، عومان، پۆڵەندا، پۆرتوگال، قەتەر، ڕۆمانیا، ڕووسیا، سعودیە، سلۆڤاکیا (کۆماری فلۆڤاکیا(، سلۆڤینیا، ئیسپانیا، سوید، سویسرا، تورکیا، میرنشینە یەکگرتووەکان- ئیماڕات، بەریتانیا، ویلایەتە یەکگرتووەکان)، دەتوانێت ڕاستەوخۆ داواکاری پێشکەشبکات لە ڕێگەی پۆرتالی ڤیزای ئەلیکترۆنی (https://visit.gov.krd/ckb) یاخود لە کاتی گەیشتنی بۆ هەرێمی کوردستان دەتوانیت ڤیزای ئەلیکترۆنی لە هەر یەکێک لە خاڵەکانی هاتنە ژوورەوەی هەرێمی کوردستان وەربگرێت.

ئەگەر کەسی بیانی هەڵگری ڕەگەزنامەی وڵاتانی لیستی (ب) بێت، کە پێکهاتوون لە وڵاتانی (جەزائیر، ئاندۆرا، ئەنگۆلا، ئانتیگوا و باربودا، ئەرجەنتین، ئەرمەنستان، ئازەربایجان، بەهاما، باربادۆس، بیلاڕووس، بێلیز، بنین، بووتان، بۆلیڤیا، بۆسنیا و هەرزەگۆڤینا، بۆتسوانا، بروونای، بورکینا فاسۆ، بوروندی، کەمبۆدیا، کامیرۆن، کەیپڤەرد، کۆماری ئەفریقیای ناوەراست، چاد، چیلی، کۆلۆمبیا، کۆمۆرۆس، کۆنگۆ، کۆنگگۆ (کۆماری برازاڤیل)، کۆستاریکا، کەناری عاج. کوبا، کوراکاو، جیبۆتی، دۆمینیکا، کۆماری دۆمینیکان، ئیکوادۆر، ئێلسالڤادۆر، گینێی ئیستوایی، ئێریتریا، دورگەکانی فارۆ، فیجی، گابۆن، کامبیا، جۆرجیا، گانا، گرینادا، گینێ، گینێبیساو، گویانا، هایتی، هۆندووراس، هۆنگ کۆنگ، هیندستان، ئیندۆنیزیا، جامایکا، کازاخستان، کیریباتی، کۆماری کۆسۆڤۆ، کۆریای باکوور، قیرغیزستان، لاوس، لێسۆتۆ، لیبێریا، لیبیا، ماکاو، مەکدۆنیا، ماداگاسکار، مالاوی، مالیزیا، ماڵدیڤ، مالی، دورگەکانی مارشاڵ، مۆریتانیا، مۆریتیۆس، مەکسیک، ویلایەتە فیدڕاڵەکانی مایکرۆنیزیا، کۆماری مەلدۆڤا، مۆناکۆ، مەنگۆلیا، مۆنتینیگرۆ، مەغریب، مۆزامبیک، میانمار، نامیبیا، نائوروو، نیپال، نیکاراگوا، نیچەر، دوورگەکانی ماریانای باکوور، پاکستان، پالاو، فەڵەستین، ماناما، پاپوا گینێی نوێ، پاراگوای، پیرو، فلیپین، ڕواندا، سانت بارتێلێمی، سەینت کیتس و نیڤیس، سەینت لوسیا، سەینت ڤینسنت و گرینادینەس، ساموا، سان مارینۆ، ساو تۆم و پرینسیپ، سێنیگال، سربیا، سیشێل، سیرالیۆن، سەنگافورە، دوورگەکانی سلێمان، ئەفریقای باشوور، باشووری سودان، سریلانکا، سودان، سورینام، سوەزیلاند، سوریا، تایوان، تاجیکستان، تەنزانیا، تایلەند، تیمۆر – لێست ( تیمۆری ڕۆژهەڵات)، تۆگۆ، تۆنگا، ترینیداد و توباگۆ، تونس، تورکمانستان، توڤالو، ئۆکرانیا، ئۆرۆگوای، ئۆزبەکستان، ڤانواتو، ڤەنزوێلا، ڤیتنام، دوورگەکسنی ڤیرجین (ویلایەتە یەکگرتووەکان)، سەحرای ڕۆژئاوا، زامبیا، زیمبابۆی، بەرپرسانی دەزگای پسپۆری نەتەوە یەکگرتووەکان) دەتوانن داوای ڤیزای ئەلیکترۆنی بکەیت لە ڕێگەی دەستەبەرێک لە هەرێمی کوردستان، بە مەبەستی دەستەبەرکردن و پشتگیریکردن وەرگرتنی کۆدی دەستەبەر بۆ کەسی بیانی.

پێویستە ماوەی بەسەرچوونی پاسپۆرتی کەسی بیانی لە شەش (٦) مانگ کەمتر نەبێت، بەلایەنی کەم لاپەڕەیەکی پاسپۆرتی بەتاڵ بێت.

ئەگەر کەسی بیانی لەسەر پاسپۆرت یان (بەڵگەنامەی گەشت)ە بیانییەکەی ئاماژە بەوەکرابوو، کە شوێنی لەدایکبوونی عێراقە، ئەوا پێویست بە وەرگرتنی ڤیزا ناکات، و بێبەرامبەر ڕێگەی پێدەدرێت، ئەگەر مانەوەشی لە هەرێم لە سی (٣٠) ڕۆژ زیاتر بوو، ئەوا هیچ سزایەکی دواکەوتنی لێوەرناگیرێت.

لە کاتی نەگەڕانەوەی کەسی بیانی بۆ وڵاتی خۆی لە کاتی خۆی و ئەنجامنەدانی ڕێکارەکانی پێدانی کارتی نشینگە، خاوەن کۆدی ڤیزە دەبێت بڕی ئەو سزایە بدات، کە لە گرێبەستی پێدانی کۆدی ڤیزا دیاریکراوە لە بەرامبەر جێبەجێنەکردنی پەبەندبوونەکانی، سەرەڕای ئەنجامدانی ڕێکارە یاساییەکانی تر، کە بەرامبەر بەڵێندەر وەردەگیرێت.

ڤیزای سەردان دەکرێت بە کارتی نشینگە، بۆ مەبەستی بە یەکگەیاندنی خێزانی.

ڤیزای گەشتیاری ناکرێت بە کارتی نشینگە بە بێ ڕەزامەندی وەزارەتی ناوخۆ.

لەکاتی ڕەتکردنەوەی ڤیزا دەکرێت داواکارییەکە دووبارە بکرێتەوە، ئەمەش دوای چاککردنی هۆکارەکانی ڕەتکردنەوە، ئەگەر هۆکار پەیوەندی نەبێت بە قەدەغەی هاتن.