ڕاستاندنی ئەو بەڵگەنامانەی لە ناوەوەی هەرێم دەردەچن (تصدیق الوثائق الصادرة من الاقلیم)، لە لایەن وەزارەتی دادەوە

دەبێت بەڵگەنامەکان ڕەسەن (اصلي) بن یان وێنەی پەسندکراوبن.

دەبێت خاوەنی بەڵگەنامەکە یان بریکارەکەی یان خزمێکی پلە سێی ئامادەبێت.

ئەگەر بەڵگەنامەکە لە فەرمانگەیەکی حکومی دەرچوو بێت، پێویستە لە وەزارەت یان سەرچاوەی ئەو فەرمانگەیەی کە بەڵگەنامەکەی لێ دەرچووە پەسەندکرابێت و دواتر وەرگێڕدرابێت.

ئەگەر بەڵگەنامەی کۆمپانیا بێت، دەبێت لە بەڕێوەبەرایەتیی تۆمارکردنی کۆمپانیاکانی سەر بە وەزارەتی بازرگانی و پیشەسازی پەسەندکرابێت. ئەو کەسەی، کە بەڵگەنامەی کۆمپانیا دێنێت دەبێت کەسێکی پەیوەنددار بێت بە کۆمپانیا، واتا دەبێت بەڕێوەبەری ڕێپێدراو (مدیر مفوض) یان بەڕێوەبەری کۆمپانیا (مدیر شرکة) یان پارێزەری کۆمپانیا یان هەر کەسێکی تر بێت بە مەرجێک بریکارنامەی بۆ کرا بێت.

ئەگەر بەڵگەنامەکە وەرگێڕدراو بێت، دەبێت لای وەرگێڕی سوێنددراو وەرگێڕدرابێت و دواتر لە فەرمانگەی دادنوسی پەسەندکرابێت.

ئەو بەڵگەنامانەی، کە لە دەرەوەی ئیدارەی حکومەتی هەرێمی کوردستانەوە دەرچوونە، واتا پارێزگاکانی (کەرکوک، موصل، بەغداد ...) لە لایەن وەزارەتی داد پەسەندکردنیان بۆ ناکرێت، بەڵام دەتوانرێت لە پەیوەندییەکانی دەرەوەی عێراق لقی هەولێر پەسەندبکرێن.